පොලිස් ඇකඩමියේ ප්‍රධානී නියෝජ්‍ය පොලිස්පති සජීව මැදවත්ත සහ අනුරාධපුර සහ පොළොන්නරුව දිස්ත්‍රික්භාර නියෝජ්‍ය පොලිස්පති කිත්සිරි ජයලත් යන මහත්වරු ජ්‍යෙෂ්ඨ නියෝජ්‍ය පොලිස්පතිධූරයන්ට උසස් කිරීමට නිර්දේශ වී තිබේ.
මහජන ආරක්ෂක අමාත්‍යාංශයට ඒ සම්බන්ධයෙන් වූ නිර්දේශ පොලිස්පති සී.ඩී. වික්‍රමරත්න මහතා මේ වන විට යොමුකර ඇත. මහජන ආරක්ෂක අමාත්‍යාංශයේ ලේකම්වරයා විසින් එම නිර්දේශයන් සම්බන්ධයෙන් යම් පරීක්ෂාවක් කර රාජ්‍ය සේවා කොමිසමට එම නිලධාරීන් දෙදෙනාගේ නම් අනුමත කිරීමට යොමු කෙරනු ඇත.
උතුරු පළාත් භාරව සේවයේ නිරතව සිටි ජ්‍යෙෂ්ඨ නියෝජ්‍ය පොලිස්පති පත්මසිරි මුණසිංහ, ඌව පළාත් භාරව සිටි ජ්‍යෙෂ්ඨ නියෝජ්‍ය පොලිස්පති රොෂාන් ප්‍රනාන්දු සහ වයඹ පළාත් භාරව සිටි ජ්‍යෙෂ්ඨ නියෝජ්‍ය පොලිස්පති රවී විජේගුණවර්ධන යන මහත්වරුන් විශ්‍රාම ගැනීමත් සමග මේ වන විට ජ්‍යෙෂ්ඨ නියෝජ්‍ය පොලිස්පතිධුර 03 ක පුරප්පාඩු පවතී. එම පුරප්පාඩුවලින් දෙකක් පමණක් සම්පූර්ණ කිරීමට නියෝජ්‍ය පොලිස්පතිවරුන් දෙදෙනෙකුගේ නාමයන් පමණක් නිර්දේශකර ඇත්තේ මේ වන විට වැඩ තහනමට ලක්ව සිටින ලලිත් ජයසිංහ මහතා නැවත පොලිස් සේවයට පැමිණීමේ අවස්ථාවක් පවතින බැවින් ඔහු වෙනුවෙන් බව පොලිස් මූලස්ථාන තොරතුරු අනාවරණය කළේය.
ලලිත් ජයසිංහ මහතාගේ වයස අවුරුදු 60 පිරී විශ්‍රාම යන්නට නියමිතව ඇත්තේ ලබන මැයි මාසයේදීය. පොලීසියේ මේ වන විට පරිපාලන ප්‍රධානියා ලෙස සේවයේ නිරතව සිටින ජ්‍යෙෂ්ඨ නියෝජ්‍ය පොලිස්පති ජගත් අබේසිරිගුණවර්ධන මහතාද ලබන ජුනි මාසයේ විශ්‍රාම ගැනීඹට නියමිතය. දකුණු පළාත් භාර ජ්‍යෙෂ්ඨ නියෝජ්‍ය පොලිස්පති රොහාන් සිල්වා මහතාද ඒ අතර විශ්‍රාම ගැනීමට නියමිතය.
මෙම නිලධාරීන් විශ්‍රාම ගැනීමත් සමග තවත් ජ්‍යෙෂ්ඨ නියෝජ්‍ය පොලිස්පතිධූර 03 ක පුරප්පාඩු වීමට නියමිතව ඇත. එම පුරප්පාඩු සදහා පොලිස් ප්‍රවාහන කොට්ඨාශයේ ප්‍රධානී නියෝජ්‍ය පොලිස්පති රන්මල් කොඩිතුවක්කු , අග්‍රාමාත්‍ය ආරක්ෂක අංශ ප්‍රධානී එම්.ඩී.ආර්.එස්.දමින්ද සහ පොලිස් මාධ්‍ය ප්‍රකාශක නීතීඥ අජිත් රෝහන යන මහත්වරුන් පිළිවෙලින් පත් කිරීමට නියමිතය.
