කොවිඩ් වසංගත තත්ත්වයේ බලපෑමට ලක්වූ සංචාරක ව්‍යාපාරය යථාතත්ත්වයට පත්කිරීමට එළඹෙන නිවාඩු සමය ඉලක්ක කරගනිමින් සංචාරක ප්‍රවර්ධන වැඩසටහන් ක්‍රියාත්මක කිරීමට අමාත්‍ය මණ්ඩලයේ අනුමැතිය හිමිව ඇත.
ඒ සම්බන්ධයෙන් අමාත්‍ය මණ්ඩල ලේකම් කාර්යාලය නිකුත් කල නිවේදනය මෙසේය.
- කොවිඩ් – 19 වසංගත තත්ත්වය හේතුවෙන් බලපෑමට ලක්වූ සංචාරක ව්‍යාපාරය නැවත වරක් 2021/2022 සංචාරක සමයේදී යථා තත්ත්වයට පත් කර ගැනීමේ සහ සංචාරකයන් ආකර්ශනය කරගැනීමේ අරමුණින් ගුවන් සමාගම් ඇතුළු සියලුම සංචාරක ක්ෂේත්‍රය හා සම්බන්ධ පාර්ශ්වයන් සාමූහික ප්‍රයත්නයක් දරමින් සිටී. ශ්‍රී ලංකා සංචාරක ප්‍රවර්ධන කාර්යාංශය විසින් ක්‍රියාත්මක කිරීමට නියමිත ගෝලීය සන්නිවේදන වැඩසටහන්වල කොටසක් වශයෙන් ප්‍රධාන සංචාරක වෙළෙඳපොළවල් තුළ වසර 05ක කාලයක් සඳහා ගමනාන්ත නියෝජිත සමාගම් සහ මහජන සම්බන්ධතා සමාගම් පත් කිරීමට මීට පෙර අමාත්‍ය මණ්ඩල අනුමැතිය ලබා දී ඇත. එකී ගෝලීය සංචාරක ප්‍රවර්ධන වැඩසටහනේ අතුරු ක්‍රියාමාර්ගයක් වශයෙන් විශේෂ අවධානය යොමු කළ යුතු සංචාරක වෙළෙඳපොළවල් වශයෙන් එක්සත් රාජධානිය, ජර්මනිය, ප්‍රංශය සහ ආසියානු කලාපයේ ප්‍රධාන මූලාශ්‍ර වෙළෙදපොළ වන ඉන්දියාව ඉලක්ක කර ගනිමින් සංචාරක ප්‍රවර්ධන වැඩසටහනක් ක්‍රියාත්මක කිරීම පිණිස සංචාරක අමාත්‍යතුමා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
