වෙන්නප්පුව සහ දංකොටුව යන පොලිස් බල ප්‍රදේශ භාරව සේවය කළ සහකාර පොලිස් අධිකාරී එරික් පෙරේරා මහතාව කසිප්පු ජාවරම්කරුවන්ගේ අවශ්‍යතාවකට රාජ්‍ය ඇමතිවරයෙකුගේ මැදිහත්වීමෙන් පොලිස් මුලස්ථානයට ස්ථාන මාරු කළේයැයි නැගෙන චෝදනාව සම්බන්ධයෙන් විමර්ශනයක් ආරම්භකරන බව මහජන ආරක්ෂක ඇමති සරත් වීරසේකර මහතා සදහන් කරයි.
පුත්තලම දිස්ත්‍රික් සජබ පාර්ලිමේන්තු මන්ත්‍රී හෙක්ටර් අප්පුහාමි මහතා විසින් පාර්ලිමේන්තුවේදී 25 වෙනිදා නැගූ ප්‍රශ්නයකට පිළිතුරු දෙමින් ඇමතිවරයා ඒ බව සදහන් කළේය.
සහකාර පොලිස් අධිකාරී එරික් පෙරේරාගේ ස්ථාන මාරුවීම සම්බන්දයෙන් මේ වන විට මහත් ආන්දෝලනයක් ඇති ව තිබේ. වෙන්ප්පුවේ සහ දංකොටුවේ විහාරස්ථානවල භික්ෂූන් වහන්සේලාත් පල්ලිවල පූජකවරුනුත් ප්‍රමුඛතරගත් ජනතා උද්ඝෝෂණයක්ද මේ වන විට එම ස්ථානමාරුවීමට එරෙහිව සංවිධානය වෙමින් පවතින බව වාර්තා වේ.
මෙවන් තත්වයක් හමුවේ පොලිස් බලධාරීන් එරික් පෙරේරාට දැනුම් දී ඇත්තේ දංකොටුවත් වෙන්නප්පුවත් හැරුණු කොට කැමැති ඕනෑම ස්ථානයකට මාරුවීමක් ලබාදීමට හැකිබවය. ඊට එරික් පෙරේරාගෙන් යහපත් ප්‍රතිචාරයක් මෙතෙක් ලැබී නැත.
