ලොව ප්‍රථම වරට මුවන් තුළ COVID-19 වෛරසය ආසාදනය වූ බව අමෙරිකාව තහවුරු කර තිබේ.

මේ අනුව covid ආසාදනය වන සතුන්ගේ ලැයිස්තුව තව දුරටත් පුළුල් වනු ඇත.

නිවේදනයක් නිකුත් කරමින් එක්සත් ජනපද කෘෂිකර්ම දෙපාර්තමේන්තුව පවසන පරිදි ඔහියෝ ප්‍රාන්තයේ වනගත සුදු වලිග ඇති මුවකු තුළ COVID-19 ඇති කරන SARS-CoV-2 වෛරසය ආසාදනය වී තිබේ.

මුවන්ගේ ආසාදන රෝග ලක්‍ෂණ පෙන්නුම් කළ බවට වාර්තා නොමැති බව එම නිවේදනය පැවසීය.

“මුවන් SARS-CoV-2 වයිරසයට නිරාවරණය වූයේ කෙසේදැයි අපි නොදනිමු,” යූඑස්ඩීඒ ප්‍රකාශක ලින්ඩ්සේ කෝල් පැවසීය. “ඒවා මිනිසුන්, පරිසරය, වෙනත් මුවන් හෝ වෙනත් සත්‍ව විශේෂයක් හරහා නිරාවරණය වී තිබෙන්නට පුළුවනි.”

මේ අනුව බල්ලන්, බළලුන්, කොටින්, සිංහයන්, හිම දිවියන්, දිය බල්ලන්, ගෝරිල්ලන් සහ මින්ක්ස් සතුන් ආදී සතුන් තුළ COVID-19 පැවැති බවට තහවුරු කර ඇත.