අපි ආණ්ඩු කරනකොටත් ඩී.ඕ ගහන්න පුළුවන් යැයි සමගි ජනබලවේගයේ මන්ත්‍රී ලක්ෂ්මන් කිරිඇල්ල මහතා අද (04) පාර්ලිමේන්තුවේ දී පැවසීය.
රිෂාඩ් බදියුදීන් මන්ත්‍රීවරයා අත්අඩංගුවට ගෙන රඳවා සිටීම ගැන කතානායකතුමා දැනුවත් කර ඇත්දැයි විමසමින් මන්ත්‍රී කිරිඇල්ල මහතා මේ බව සඳහන් කළේය.
කතානායකතුමාට, රිෂ්ඩ් බදියුදීන් මන්ත්‍රීවරයා අත්අඩංගුවට ගැනීම ගැන දන්වා තිබෙනවා දැයි ලක්ෂ්මන් කිරිඇල්ල මන්ත්‍රීවරයා මෙහි දී විමසුවේය.
ආණ්ඩු පක්ෂයේ සිටියත් විරුද්ධ පක්ෂයේ සිටියත් මන්ත්‍රී වරප්‍රසාද වැදගත් යැයි කී කිරිඇල්ල මන්ත්‍රීවරයා, බ්‍රිතාන්‍ය පාර්ලිමේන්තු සම්ප්‍රදාය අනුගමනය කරන මෙරට පාර්ලිමේන්තුව මන්ත්‍රී වරප්‍රසාද කඩවන තැනට කටයුතු කර ඇතැයි පෙන්වා දුන්නේය.
මෙහි දී රිෂාඩ් බදියුදීන් මන්ත්‍රීවරයා අත්අඩංගුවට ගැනීම ගැන තමන්ට ලිඛිතව දන්වා තිබෙන බවත් පරීක්ෂණ සඳහා එම අත්අඩංගුවට ගැනීම කර ඇති බවත් කතානායක මහින්ද යාපා අබේවර්ධන මහතා අවධාරණය කළේය.
පරීක්ෂණ සඳහා යැයි කියා එලෙස අත්අඩංගුවට ගත නොහැකි බව ලක්ෂ්මන් කිරිඇල්ල මහතා කියා සිටියේය.
මේ අවස්ථාවේ දී රිෂාඩ් බදියුදීන් මන්ත්‍රීවරයා ද අදහස් පළ කළ අතර පසුගිය අප්‍රේල් 24වැනිදා සිට දවස් 122ක් තමන් රඳවා ඇතැයි ද ඉන් දින 97ක්ම එක් කාමරයකට සිරවී ගත කරනවා යැයි ද කියා සිටියේය.
තමන් අත්අඩංගුවට ගත්තේ අතිරේක ලේකම් බාලසුබ්‍රමනියම්ට මිනිත්තු එක හමාරක් කතා කරා කියලා යැයි රිෂාඩ් බදියුදීන් මන්ත්‍රීවරයා මෙහි දී පැවසීය.
තවත් අදහස් පළ කිරීමට කතානායකවරයාගෙන් රිෂාඩ්ම බදියුදීන් මන්ත්‍රීවරයා ඉල්ලා සිටිය ද කතානායකතුමා ඊට ඉඩ නුදුන්නේය.
බාලසුබ්‍රනියම් දැන් කෝ යැයි විමසූ අමාත්‍ය ජොන්ස්ටන් ප්‍රනාන්දු මහතා ඔහු රට පැන ඇතැයි හෙළි කළේය.