කොළඹ හා තදාසන්න ප්‍රදේශවලදී 2008 ත් 2009 ත් අතර වසරවලදී තරුණයින් 11 දෙනෙක් පැහැරගෙන අතුරුදන් කලායැයි කියනු ලබන සිදුවීමක් සම්බන්ධයෙන් චෝදනා ලැබ සිටින හිටපු නාවික හමුදාපති වසන්ත කරන්නාගොඩ මහතාට එරෙහිව ඇති චෝදනා පවත්වාගෙන යාමට අපේක්ෂා නොකරන බව නීතිපතිවරයා අද කොළඹ ත්‍රීපුද්ගල මහාධිකරණ විනිසුරු මඩුල්ල හමුවේ ප්‍රකාශකර තිබේ.
චම්පා ජානකී රාජරත්න, අමල් රණරාජා සහ නවරත්න මාරසිංහ යන මහත්ම මහත්මීන් ගෙන් සමන්විත ත්‍රිපුද්ගල මහාධිකරණ විනිසුරු මඩුල්ල ඉදිරියේ නඩුව කැදවූ අවස්ථාවේදී ඒ බව සදහන් කර ඇත්තේ නීතිපතිවරයා වෙනුවෙන් පෙනී සිටි ජ්‍යෙෂ්ඨ රජයේ නීතිඥ ජනක බණ්ඩාර මහතා මහතා ය.
එම නඩුවේ 14වන විත්තිකරු වශයෙන් නම්කර සිටින හිටපු නාවික හමුදාපති වසන්ත කරන්නාගොඩ මහතා තමන්ව මෙම නඩුවේ විත්තිකරුවකු වශයෙන් නම් කිරීමට එරෙහිව අභියාචනාධිකරණය හමුවේ රිට් පෙත්සමක් ගොනුකර ඇති බවත් ඒ අනුව ඔහුට එරෙහිව ඉදිරිපත්කර තිබෙන චෝදනා විභාග කිරීම වළක්වාලමින් අභියාචනාධිකරණය විසින් තහනම් නියෝගයක් නිකුත්කර ඇති බවද ජ්‍යෙෂ්ඨ නීතිඥ ජනක බණ්ඩාර මහතා අධිකරණය හමුවේ කරුණු දක්වා තිබේ.