සමාන්තර සේවාවන්ට බලපෑමක් නොවන පරිදි ගුරු විදුහල්පති වැටුප් විෂමතාවයට තිරසර විසඳුමක් නොවැම්බර් මාසයේ ඉදිරිපත් කරන අය-වැය ලේඛනයෙන් ලබා දෙන බව අධ්‍යාපන අමාත්‍ය මහාචාර්ය ජී.එල් පීරිස් මහතා පවසයි.
ගුරු විදුහල්පති වැටුප් විෂමතාව පිළිගන්නේදැයි විපක්ෂ නායක සජිත් ප්‍රේමදාස මහතා අද (04) දින පාර්ලිමේන්තුවේ කළ විමසීමකට පිළිතුරු දෙමින් අධ්‍යාපන අමාත්‍ය මහාචාර්ය ජී.එල් පීරිස් මහතා පැවසීය.
අධ්‍යාපන අමාත්‍ය ජී.එල් පීරිස් මහතා මෙසේ ද කීවේය.
විෂමතාවක් තිබෙන බව පිළිගන්නවා. යමක් කළ යුතුයි. වේතනය වැඩි කළ යුතුයි. විනිවිදව කරන්න ඕනි. සමාන්තර සේවාවන්ට බලපෑමන් නොවන පරිදි සම්පූර්ණ ක්ෂේත්‍ර ගැන අවධානය යොමු කරලයි අපි විසඳුම දෙන්නෙ. සුදුසු ක්‍රමවේදය තමයි අය-වැය ලේඛනය. නොවැම්බර් මාසයේ තිබෙන අය-වැය ලේඛනය හරහා තිරසාර හා සාධාරණ විසඳුමක් ඉදිරිපත් කරනවා.
පෞද්ගලික අංශයත් ගෙවන වැටුප් සියයට 40කින් අඩු කරලා තියෙනවා. පෞද්ගලික අංශ ඒ අයගේ වේතන සියයට 40කින් භාගයකින් විතර අඩුවෙලා තියෙනවා. අපි අපේ ගුරුවරුන්ගේ වැටුප් ශත 5කින් අඩු කරලා නෑ. අපේ රජය පාසල් වහලා තිබුණත් වේතන, දීමනා අඩු කරලා නැහැ. රජයේ ආදායම් මාර්ග මොනවාද කියලා සජිත් ප්‍රේමදාස මහතා දන්නවා. වැට් බද්ධ විශාල ලෙස කඩා වැටී තිබෙනවා. රේගුව, සුරාබදු දෙපාර්තමේන්තුව බලන්න. ඒ සියල්ල කොවිඩ් 19 නිසා කඩා වැටිලා තියෙන්නෙ. විදේශ රැකියා. ඒවා කඩා වැටිලා තියෙන්නෙ.
අය-වැය ලේඛනයට තියෙන්නෙ තව මාස 3යි. මොනවා වුණත් කමක් නෑ කියලා අහිංසක දරුවන් හතළිස් ලක්ෂ හැට තුන් දහසකට උගන්වන්නෙ නැතිව ඉන්න එක සාධාරණයි ද ? විදුහල්පති වැටුප් වැඩි කරන එක වුණත් තීරණය කරද්දි වැටුප් කොමිෂම, මහා භාණ්ඩාගාරය, මුදල් ඇමතිතුමා එක්ක සාකච්ඡා කරලා තමයි ඒ ගැන තීරණය කරන්නෙ. මම අධ්‍යාපන ඇමති විධියට එය තනියම කරන්න බැහැ.
සුබෝධනී කමිටු වාර්තාව ඉදිරිපත් කළේ අධ්‍යාපන අමාත්‍යංශය, එය කරන්න බැහැ කියලා වැටුප් කොමිෂන් සභාව කියලා තියෙනවා. එය ඉටු කළොත් අනෙකුත් සේවා සමඟ ගැටලු ඇතිවෙන බව දන්වා තිබෙනවා. සංයුක්ත සේවා ඇති කිරීම සම්බන්ධයෙන් 2008 ලබා දුන් නඩු තීන්දු තිබෙනවා. එය අපේ රජයත් පිළිගන්නවා.
ලක්ෂ 6820ක් ආරක්ෂක උපකරණය වෙනුවෙන් අධ්‍යාපන අමාත්‍යංශය මේ වනවිට වැය කරලා තියෙනවා. ඒවා යොමු කරලා තියෙනවා. සියයට 87කට පළමු මාත්‍රාව ලබා දී තිබෙනවා. කොළඹ සියයට 98ක් ගුරුවරු මාත්‍රාව අරගෙන තියෙනවා. මාර්ගගත අධ්‍යාපනය ලබා ගන්න සුදුසුම තැන තියෙන්නෙ පාසලේ ඒ නිසා තමයි මම කියන්නේ, මම අවුරුදු 26ක් මේ රටේ ගුරුවරයකු ලෙස කටයුතු කළා. මේ රටේ විශ්ව විද්‍යාලයකින් මම පළමු උපාධිය ගත්තෙ. ඒ ගුරු ගෞරවය දන්න නිසා තමයි අපි ගුරුවරුන්ට පාසලට එන්න කියලා ආයාචනා කරන්නේ යැයි මහාචාර්ය ජී.එල් පීරිස් මහතා පැවසීය.