ඉන්දියාව සමඟ අද (23) පැවැති එක්දින තරගයෙන් කඩුලු 3ක ජයක් ලැබීමට දසුන් ශානකගේ නායකත්වයෙන් යුතු කෝඩුකාර ශ්‍රී ලංකා කණ්ඩායම සමත්විය.

එහෙත් තරගාවලියේ ජය 2-1ක් ලෙස තහවුරු කර ගැනීමට ඉන්දියානු කණ්ඩායම සමත්විය. කොළඹ ආර්.ප්‍රේමදාස ජාත්‍යන්තර ක්‍රිකට් ක්‍රීඩාංගණයේ පැවැති තරගයේ පන්දුවාර තුනක් වර්ෂාවට සේදී ගිය අතර කාසිය වාසිය දිනා පළමුව පන්දුවට පහර දුන් ඉන්දියාව පන්දුවාර 43.1ක දී සියලු දෙනා දැවී ලකුණු 225ක් ලබා ගත්තේය.

ඉන්දියාව වෙනුවෙන් ප්‍රිතිවි ශාව් ලකුණු (49) සංජු සැම්සන් (46) සූරියකුමාර් යාදෙව් (40) ලබා ගත්හ. පන්දු යැවීමේ දී ප්‍රවීන් ජයවික්‍රම (59/3) සහ අකිල ධනංජය (44/3) කඩුලු 3 බැගින් දවා ගනිමින් ඉන්දිය ඉනිම සුණු විසුණු කළහ.

පිළිතරු ඉනිම ක්‍රීඩා කළ ශ්‍රී ලංකා කණ්ඩායම පන්දුවාර 39ක දී ජයග්‍රාහී ඉලක්කය පසුකර යාමට සමත්විය. පිත්තෙන් දස්කම් දැක්වූ අවිශ්ක ප්‍රනාන්දු (76) සහ භානුක රාජපක්ෂ (65) ශ්‍රී ලංකාවේ ජයග්‍රහණයට පාර කැපූ හ.

ඉන්දියාව සහ ශ්‍රී ලංකාව අතර විස්සයි 20 තරගාවලිය ලබන 25 වැනිදා ආරම්භ වීමට නියමිතය.