නදීක දයා බණ්ඩාර – මහනුවර

පළමු කුඹල් පෙරහැර වීදි සංචාරයත් සමඟ ඓතිහාසික සෙංකඩගල ඇසළ පෙරහැර මංගල්‍යය අද (30) රාත්‍රී ආරම්භ වේ.

රාත්‍රී 07.05ට උතුරු දිශාභිමුඛව පිටත්වන පෙරහැර නාථ, විෂ්ණු, පත්තිනි හා කතරගම යන සිව් මහ දේවාල පෙරහැර සමඟින් දළදා වීදිය, ඩී.එස්.සේනානායක වීදිය, පන්සල පාරේ ඉහළට පැමිණ දේව වීදිය, කොළඹ වීදිය, යටිනුවර වීදිය සහ රජ වීදිය ඔස්සේ ඉහළට විත් ගෙවැදීම සිදුවේ.

අද සිට දින 05ක් එනම් අගෝස්තු මස 03 වන දින දක්වා කුඹල් පෙරහැර වීදි සංචාරය කරන අතර පළමු රන්දෝලි පෙරහැර ආරම්භ වන්නේ අගෝස්තු මස 04වන දිනයි. රන්දෝලි පෙරහැර ද දින 05ක් වීදි සංචාරය කෙරේ. අවසන් රන්දෝලි පෙරහැර අගෝස්තු මස 08 වන දින රාත්‍රී වීදි සංචාරයට එක්වේ.

අවසන් පෙරහැරේ දී සධාතුක පෙරහැර කරඩුව අස්ගිරිය ඓතිහාසික ආදාහන මළුව රජ මහ විහාරයේදී එක් රැයත් තැම්පත් කරන අතර අනතුරුව සිව් මහා දේවාල පෙරහැර ගැටඹේ දිය කපනා ගංතොටේදී දිය කැපීම සහ පසු දින දහවල් පෙරහැර අස්ගිරිය ආදාහන මළුව රජ මහ විහාරයේ සිට දළදා මාලිගාව වෙත දළදා මාලිගාය වෙත ගෙවැදීම සිදුවේ.

මහ පෙරහැරින් අනතුරුව පෙරහැර නිමාවට පත් බව සඳහන් සන්දේශය දියවඩන නිලමේ ප්‍රදීප් නිලංග දෑල මහතා විසින් ජනාධිපති අනුර කුමාර දිසානායක මහතා වෙත පිළිගැන්වීමෙන් පසු මෙවර වාර්ෂික පෙරහැර මංගල්‍ය නිමාවට පත්වේ.