පිහිටුවීමට යෝජිත සර්වපාක්ෂික ආණ්ඩුවේ
නව අග්‍රාමාත්‍යධුරය සඳහා වන විපක්ෂය යෝජනා කරන නම හෙට (15) පැවැත්වෙන පක්ෂ නායක රැස්වීමේදී කතානායකවරයා වෙත ඉදිරිපත් කරන බව සමගි ජනබලවේගයේ මහලේකම් රංජිත් මද්දුමබණ්ඩාර මහතා ප්‍රකාශ කළා.
දැනට ඒ සඳහා විපක්ෂනායක සජිත් ප්‍රේමදාස මහතාගේ නම යෝජනා වී ඇති බවයි මහලේකම්වරයා සඳහන් කළේ.
මේ සම්බන්ධයෙන් වන විශේෂ සාකච්ඡාවක් අද (14) පැවැත්වුණා.
එම සාකච්ඡාව සඳහා ලංකා කම්කරු කොංග්‍රසය,ශ්‍රී ලංකා නිදහස් පක්ෂය,ස්වාධීන පක්ෂ 10 නියෝජිතයන් සහභාගී වී ඇති අතර පාර්ලිමේන්තු මන්ත්‍රී ඩලස් අලහප්පෙරුම මහතාගේ නියෝජිතයා ලෙස පාර්ලිමේන්තු මන්ත්‍රී ඩිලාන් පෙරේරා මහතා සහභාගී වුණා.
එහෙත් ජනතා විමුක්ති පෙරමුණ මෙම සාකච්ඡාවට සහභාගී වූයේ නැහැ.
එහිදී ස්වාධීන පක්ෂ 10 නියෝජනය කරමින් මෙම සාකච්ඡාවට සහභාගී වූ පාර්ලිමේන්තු මන්ත්‍රී අතුරලියේ රතන හිමි සඳහන් කළේ අදාළ යෝජනාව සම්බන්ධයෙන් අනෙකුත් පක්ෂ සමඟ තවදුරටත් සාකච්ඡා කර අවසන් තීරණය ප්‍රකාශ කරන බවයි.
මේ අතර ගෝඨාභය රාජපක්ෂ මහතා ජනාධිපතිධූරයෙන් ඉල්ලා අස්වීම නිසා වැඩබලන ජනාධිපතිවරයා ලෙස වත්මන් අග්‍රාමාත්‍ය රනිල් වික්‍රමසිංහ මහතා හෙට (15) දිනයේදී දිවුරුම්දීමට නියමිතව ඇත.
සමඟි ජන බලවේගයේ ජාතික සංවිධායක, පාර්ලිමේන්තු මන්ත්‍රී තිස්ස අත්තනායක මහතා සඳහන් කරන්නේ රනිල් වික්‍රමසිංහ මහතාගේ ජනාධිපතිධූරය යටතේ අග්‍රාමාත්‍යධූරය දැරීමට විපක්ෂනායක සජිත් ප්‍රේමදාස මහතා සූදානම් නොමැති බවයි.