සේවා නියුක්තිකයන්ගේ භාර අරමුදල (ඊ.ටී.එෆ්) හා සේවක අර්ථසාධක අරමුදලෙන් (ඊ.පී.එෆ්) 25% අධිභාර බද්දක් අයකිරීමේ යෝජනාවට තම පක්ෂය සම්පූර්ණයෙන්ම විරුද්ධ බව ශ්‍රී ලංකා නිදහස් පක්ෂය පවසයි.
එහි ප්‍රචාරක ලේකම්, පාර්ලිමේන්තු මන්ත්‍රී ශාන්ත බණ්ඩාර මහතා පවසන්නේ
මේ වන විට විදෙස්ගතව සිටින පක්‍ෂ නායක, හිටපු ජනාධිපති මෛත්‍රීපාල සිරිසේන මහතා යළි මෙරටට පැමිණි පසු පක්‍ෂ දේශපාලන මණ්ඩලය, මධ්‍යම කාරක සභාව සහ පරිපාලන කමිටුව එක්ව මේ ගැන සාකච්ඡා කර ඉදිරියේදී කටයුතු කළ යුතු ආකාරය ගැන තීරණයක් ගැනීමට බලාපොරොත්තු වන බව යි.
එමෙන්ම ඊ.ටී.එෆ් සහ ඊ.පී.එෆ් අරමුදල්වලින් බදු අයකිරීම වැඩකරන ජනතාවට විශාල වශයෙන් බලපාන ප්‍රශ්නයක් බැවින් ජනාධිපතිවරයා හා මුදල් අමාත්‍යවරයා සමඟත් ඉදිරියේදි මේ පිළිබඳව සාකච්ඡා කිරීමට බලාපොරොත්තු වන බව මන්ත්‍රීවරයා සදහන් කළේය.
මෙම අරමුදල්වලින් අධිභාර බද්දක් අයකරගැනීමේ යෝජනාවට විෂය භාර ඇමතිවරයා ද විරුද්ධත්වය පළ කර ඇතැයි ද පාර්ලිමේන්තු මන්ත්‍රී ශාන්ත බණ්ඩාර මහතා වැඩිදුරටත් සඳහන් කර ඇත.