රට යළි වතාවක් දියුණු රටක් කරන්නට යන ගමනේ මංගල වෙඩිමුරය මැයි දින දින රැළියත් සමග සනිටුහන් කරන බවත් ජනතාවගේ ජීවන ප්‍රශ්නය විසඳන සැබෑ අරගලය දිනා ගැනීමෙන් බොරු අරගලයකට පිළිතුරු දුන් නායකයා වන්නේ ජනාධිපති රනිල් වික්‍රමසිංහ මහතා බවත් කම්කරු හා විදේශ රැකියා ඇමති මනූෂ නානායක්කාර මහතා පවසයි. 
මාලිගාවත්තේ පැවති එක්සත් ජාතික පක්ෂයේ මැයි දින රැළියට සහභාගි වෙමින් මනුෂ නානායක්කාර මහතා ඊයේ මේ බව පැවසීය.
වතු කම්කරුවාගේ දෛනික වැටුප, රාජ්‍ය සේවක වැටුප, පෞද්ගලික අංශයේ සේවක අවම වැටුප ඉහළ දමමින් කම්කරු ශ්‍රමික ජනතාව වෙනුවෙන් යුතුකම් ඉටු කළ නායකයා වන්නේ වත්මන් ජනාධිපතිවරයා බව අමාත්‍යවරයා කීවේය .
“ගිනි ගෙන තිබුණු, පෝලිම් තිබුණු, බෙහෙත් නැතුව තිබුණු, හෙට දවස ගැන අනාගත බලාපොරොත්තු අතෑරලා දාලා හිටපු රටේ රාජ්‍ය සේවක වැටුප් වැඩි කරලා, පෞද්ගලික අංශයේ සේවකයාගේ අවම වැටුප වැඩි කරලා, වතු කම්කරුවාගේ දෛනික වැටුප රුපියල් 1700ට වැඩි කරලා, අද දවසේ කම්කරු රැළියත් ආරම්භ කරලා, කම්කරුවා – කම්කරුවා හැටියට මාකට් කරන අවසන් කම්කරු රැළියයි මේ පවත්වන්නේ.
රනිල් වික්‍රමසිංහ මැතිතුමා මේ ජයග්‍රාහී මැයි රැළිය අමතන්නේ ජයග්‍රාහී එක්සත් ජාතික පක්ෂය මේ අවුරුදු දෙකට රටට කරපු සේවය සනිටුහන් කරන, යළි නොවැටී තවත් දශකයකට රනිල් වික්‍රමසිංහ මැතිතුමන් මේ රටේ පාලනය භාර ගැනීමේ වැඩ කටයුත්ත ආරම්භ කරන, අභිමානවත් රටක් හැදීමේ මැයි දින රැළිය ලෙසයි.
රාජ්‍ය සේවකයාගේ වැටුප වැඩි කරලා, පෞද්ගලික අංශයේ සේවකයාගේ මූලික අවම වැටුප රුපියල් 21,000 දක්වා වැඩි කරලා, වතු කම්කරු ජනතාවගේ අවම වැටුප රුපියල් 1700 කරලයි අපි ආවේ. සමහරු කෑගැහුවා ණය ප්‍රතිව්‍යූහගත කරනකොට සියයට 09යි ඊපීඑෆ් ඊටීඑෆ් එකට හම්බ වෙන්නේ කියා. ඒ සියයට 09ට මෙන්න මංකොල්ල කනවා, ඊපීඑෆ් ඊටීඑෆ් එක කොල්ලකන්න හදනවා කියලා කෑගහපු අයට කණ පැලෙන්න උත්තරයක් විදිහට ඊපීඊෆ් ඊටීඑෆ් එකට සියයට 13ක් ගෙවන්න පෙරේදා තීන්දු අරගෙන තමයි අද රනිල් වික්‍රමසිංහ මැතිතුමා මේ මැයි මේ මැයි දින රැළියට ආවේ. ඒක ලේසි පහසු වැඩක් නෙවෙයි. මේ කම්කරුවෝ තමයි හැමදාමත් ජෙප්පොන්ගේ බිස්නස් එක. කම්කරුවා බිස්නස් එක කරගෙන, රටට සංවර්ධන ව්‍යාපෘති එනකොට ඒ ව්‍යාපෘති හැම එකම කඩාකප්පල් කරන්න පිටරටවලින් – කර්මාන්තශාලාවලින් අල්ලස් අරගත්තා. ඒ අල්ලස් ගත්තු සල්ලි තමයි ‘එක මිටට’ කියාගෙන හන්දි හන්දි ගාණේ රට වටේම සෙනග එකතු කරලා කම්කරුවෝ මාකට් කරලා සල්ලි ගන්න ජෙප්පෝ, එන්පීපීය කැමති නෑ, මාලිමාව කැමති නෑ මේ රට දියුණු වෙනවට. කොටින්ම මේ රටේ කම්කරුවා වැඩ්ඩෙක් වෙනවට කැමති නෑ.
මේ රටේ කම්කරුවා ශ්‍රමිකයෙක් වෙනවට ඔය ජෙප්පෝ කැමති නෑ. ඒ නිසා තමයි හැමදාමත්ම මේ රටේ ආර්ථික වර්ධනයක් එනකොට, රටේ ආර්ථිකය හදන්න ආයෝජන එනකොට හැම වෙලාවම කකුලෙන් ඇද්දේ. අලුතෙන් කම්කරු ප්‍රතිපත්තිය එනකොට, රැකී රක්ෂා පනත එනකොට ලබන අවුරුද්දේ නැවත වතාවක් කම්කරුවා මාකට් කරන්න, නැත්නම් විකුණන්න ජෙප්පොන්ට ඉඩ හම්බ වෙන්නේ නැති නිසා තමයි අද ජෙප්පො කලබල වෙලා තියෙන්නේ.
රට බේරා ගත්, සැබෑ අරගලයේ, රට දිනවන අරගලයේ නායකයා, ශ්‍රමිකයා දිනවන නායකයා වන්නේ රනිල් වික්‍රමසිංහ ජනාධිපතිවරයායි.”යැයි හෙතම කීවේය.
