බස්රථ ධාවනයේදී මාර්ග නීති උල්ලංඝණය කිරීම ඇතුළු නීති විරෝධී කටයුතුවල නියැලෙන අන්තර් පළාත් බස් රථ සේවකයන් පිළිබඳ වීඩියෝ දර්ශන යොමුකිරීම සඳහා ජාතික ගමනාගමන කොමිසම 071-2595555 යන නව දුරකථන අංකය හදුන්වාදී තිබේ.
ඒ අනුව බස්රථ ධාවනයේදී සේවකයන් සිදුකරන විවිධ නීති විරෝධී ක්‍රියා පිළිබඳව වීඩියෝ දර්ශන වට්ස්ඇප්, වයිබර් සහ ඊමෝ යන සමාජ මාධ්‍ය ජාලා හරහා ඉහත දුරකථන අංකයට යොමු කරන ලෙස ජාතික ගමනා ගමන කොමිසමේ අධ්‍යක්‍ෂ ජනරාල් ආචාර්ය තිලාන් මිරැන්ඩා මහතා ජනතාවගෙන් ඉල්ලීමක් කරයි.
ඔහු සදහන් කළේ එම වීඩියෝ දර්ශන අදාල නීතිවිරෝධී ක්‍රියාව සම්බන්ධ පරීක්‍ෂණවලදී සාක්‍ෂියක් හැටියට යොදාගැනීමට කටයුතු කරන බවයි.
එමෙන්ම ජාතික ගමනාගමන කොමිසමේ ක්ෂණික දුරකථන අංකය වන 1955 අංකයට අඛණ්ඩව පැමිණි කළ හැකි බවත් තව දුරටත් මගී ජනතාවට ආරක්‍ෂාව සැළසීම සඳහා මෙම නව අංකය හදුන්වා දුන් බවත් ආචාර්ය තිලාන් මිරැන්ඩා මහතා වැඩි දුරටත් සදහන් කළේය.
