තමන් සේවය කරනු ලබන පැය 8 ක සේවා කාලයෙන් පසුව සිදුවන හදිසි විදුලි බිඳ වැටීම් යථා තත්ත්වයට පත් කිරීමේ කටයුතුවලින් ඉවත් වන බව, ලංකා විදුලිබල මණ්ඩල ඉංජිනේරු සංගමයේ සභාපති සෞම්‍ය කුමාරවඩු මහතා පවසයි.
ලංකා විදුලි බල මණ්ඩලයේ ඉංජිනේරු සංගමය මේ වනවිට අකුරට වැඩ කිරීමේ අඛණ්ඩ වෘත්තීය සමිති ක්‍රියාමාර්ගයක නිරතව සිටින අතර අද (01) සිට අකුරට වැඩ කිරීමේ දෙවන අදියර ක්‍රියාත්මක වේ.
නීත්‍යානුකුල නොවන නිව් ෆෝට්‍රෙස් LNG ගනුදෙනුව ක්‍රියාත්මක නොකිරීම ඇතුළු ඉල්ලීම් 05 ක් මුල් කරගනිමින් ලංකා විදුලිබල මණ්ඩලයේ ඉංජිනේරු සංගමය පසුගිය 25 වැනිදා දහවල් 12 සිට වෘත්තීය සමිති ක්‍රියාමාර්ගයක නිරතවේ.
ලංකා විදුලිබල මණ්ඩල ඉංජිනේරු සංගමය මේ බව සදහන් කළේ, අද පස්වරුවේ මාධ්‍ය හමුවකට එක්වෙමිනි.
