ලොව වායු දූෂණය වැඩිම නගර 30 අතරින් 21 ක්ම ඉන්දියාවේ පිහිටා ඇති බවට වාර්තා වේ. වසරකට ඉන්දියානුවන් මිලියනයක් පමණ වායු දූෂණය හේතුවෙන් මියයන බවටද ඇතැම් වාර්තා පෙන්වා දෙයි.
ඉන්දියාව ලොව දෙවැනියට විශාලතම ගඩොල් නිෂ්පාදකයා වීම මෙයට ප්රධානතම සාධකයක් වී ඇත (ලෝකයේ කාබන් නිෂ්පාදනයෙන් 20% කටම හේතූවනුයේ ගඩොල් පෝරණු නිසා ඇතිවන කාබන් විමෝචනයයි). වායු දූෂණය නිසා සිදුවන පරිසර හානිය වැළැක්වීම සඳහා නවෝත්පාදනයක් ඉදිරිපත් කිරීම මගින් ගත් කදිම ආදර්ශයක් පසුගියදා විදෙස් ජනමාධ්ය මගින් වාර්තා කොට තිබුණි. ඒ වායුගෝලයේ ඇති කාබන් අංශු ඇසුරින් නිර්මාණය කර ඇති, පොළොවට අල්ලන ටයිල් වර්ගයක් නිර්මාණය කිරීමයි.
වෘත්තියෙන් ගෘහ නිර්මාණ ශිල්පියකු වන ඉන්දීය ජාතික තේජාස් සිද්නාල් විසින් ආරම්භ කරන ලද, Carbon Craft Design නම් ආයතනය මගින්, වායුගෝලයේ ඇති කාබන් අංශු ලබාගෙන, ඒ ඇසුරෙන් මෙම අලංකාර ටයිල් වර්ගය නිර්මාණය කිරීම සිදු කරයි. මේ පිළිබඳව අදහස් දක්වමින් ඔහු විසින් පවසා ඇත්තේ, ගෘහ නිර්මාණ ශීල්පීන් ලෙස ලෝකයට මෙවන් හානියක් තමන් අතින් සිදු වීම පිළිබඳව තමන් ඉමහත් ලැජ්ජාවට පත්වූ බවත්, මේ සඳහා පිළියමක් සෙවීම තම මූලික වගකීමක් ලෙසට සැළකු බවයි. මේ අනුව තම නව නිෂ්පාදනය සැලසුම් කල බවත් ඔහු විසින් වැඩිදුරටත් පවසා ඇත.
(මංජුල දීපාල් ද සිල්වා විසින් theplanetaroundus.com ෆේස්බුක් විද්යුත් සඟරාවෙහි පළකරන ලද ලිපියකි. තොරතුරු සහ ඡායාරූප අන්තර්ජාලයෙනි)
මෙම ලියුම්කරු විද්යාවේදී, ව්යාපාර පරිපාලන (විශේෂ) උපාධිය ශ්රී ජයවර්ධනපුර විශ්වවිද්යාලයෙන් ද, රාජ්ය පරිපාලන පශ්චාත් උපාධිය කොළඹ විශ්ව විද්යාලයෙන් ද ලබා ඇති අතර මනෝවිද්යාව පිළිබඳව ඩිප්ලෝමා ධාරියෙකි. ශ්රී ලංකා විද්වත් වෘත්තික උපදේශක ආයතනයේ සාමාජිකයකු ද වේ. බ්රිතාන්ය පරිඝණක සංගමයේ ද හිටපු සාමාජිකයෙකි.