අපරාධ පරීක්ෂණ දෙපාර්තමේන්තුවේ නිලධාරීන් ලෙස පෙනී සිටිමින් මාවතගම පිහිටි නිවසකටද ඊයේ අලුයම කඩාවැදුනු තරුණ භික්ෂුවක් ඇතුළු හය දෙනෙකුගේ කණ්ඩායමක් මාවතගම පොලීසිය විසින් අත්අඩංගුවට ගෙන ඇත.
එම භික්ෂුව අතුරුගිරියේ විහාරස්ථානයක වැඩ සිටින අතර පොලීසියට උන්වහන්සේ ලබාදී ඇත්තේ රාජගිරියේ විහාරස්ථානයක ලිපිනයකි.
උන්වහන්සේ ප්‍රශ්න කිරීමේදී පවසා ඇත්තේ තමන් වහන්සේ බොදු බලයට සම්බන්ධව කටයුතුකරන බවය. පැමිණි පිරිස අතරද එම සංවිධානයට සම්බන්ධව සිටින අය බවට තොරතුරු අනාවරණය වී ඇත.
අපරාධ පරීක්ෂණ දෙපාර්තමේන්තුවේ නිලධාරීන් විසින් උන්වහන්සේ කණ්ඩායමක් සමඟ කඩාවැදී ඇත්තේ කලක් උන්වහන්සේගේ රියදුරු ලෙස කටයුතු කළ පුද්ගලයාගේ නිවසටය. එම නිවසට කඩාවැදී ඇත්තේ සිතූ පැතූම් ඉටුකරන බව කියන රන් බුදුපිළිමයක් සොයාගෙන බව පොලීසිය කියයි.
නිවෙස් හිමියා එම අවස්ථාවේදී නිවසේ සිට නැත. බිරිද සහ දරුවා පමණක් නිවසේ සිට ඇත. බිරිද විසින් පොලීසියට පැමිණිලිකර ඇත්තේ මෙම පිරිස රුපියල් ලක්ෂ 06ක් පමණ වටිනා රන් මාලයක් සහ මුදු 02ක් කොල්ලකා ඇති බවය. ඇය විසින් 119 පොලිස් හදිසි ඇමතුම් අංශයට ලද තොරතුරකට අනුව මෙම පිරිස එම අවස්ථාවේදීම අත්අඩංගුවට ගැනීමට හැකියාව ලැබී තිබේ.
