රජයේ සේවකයන්ට සිකුරාදා දින නිවාඩු දිනයක් ලෙස මේ සතියේ සිට ප්‍රකාශයට පත් කිරීමේ යෝජනාවට කැබිනට් අනුමැතිය හිමිව තිබේ.
ඉදිරි මාස 3ක කාලයක් සඳහා මෙය වලංගු වේ.
කෙසේ වෙතත්, මෙයට ජලය, විදුලිය, සෞඛ්‍ය, ආරක්ෂක සේවා, අධ්‍යාපන, ප්‍රවාහන, වරාය සහ ගුවන් සේවා සහ අනෙකුත් අත්‍යවශ්‍ය සේවා ඇතුළත් නොවේ.
දැනට පවතින ඉන්ධන හිඟය හේතුවෙන් මගී ප්‍රවාහනයට බාධා පැමිණ ඇති අතර, එම තත්ත්වය යටතේ රාජ්‍ය අංශයේ සේවකයින්ට සිය ප්‍රවාහන පහසුකම් සපයා ගැනීම ගැටලුවක් බවට පත් වී තිබේ.
මෙම තත්ත්වය යටතේ සතියේ රාජකාරි කරනු ලබන එක් (01) දිනක් සඳහා රජයේ නිලධාරින්ට නිවාඩු ලබා දී ඉදිරියේදී ඇති විය හැකි යැයි අපේක්ෂිත ආහාර හිඟයට පිළියමක් වශයෙන් සිය ගෙවතු ආශ්‍රිතව හෝ වෙනත් ස්ථානයක කෘෂිකාර්මික කටයුත්තක නිරත වීම පිණිස ඔවුන්ට අවශ්‍ය පහසුකම් සලසා දීම යෝග්‍ය බව පෙනී ගොස් ඇත.
ඒ අනුව, ජලය, විදුලිය, සෞඛ්‍ය, ආරක්ෂක සේවා, අධ්‍යාපන, ප්‍රවාහන, වරාය සහ ගුවන් සේවා වැනි අත්‍යවශ්‍ය සේවා සපයන රාජ්‍ය ආයතන හැර ඉතිරි රාජ්‍ය ආයතන ඉදිරි මාස 03ක කාලය තුළ සිකුරාදා දිනවල වසා තැබීම පිණිස රාජ්‍ය පරිපාලන, ස්වදේශ කටයුතු, පළාත් සභා හා පළාත් පාලන අමාත්‍යවරයා ඉදිරිපත් කළ යෝජනාව අමාත්‍ය මණ්ඩලය විසින් අනුමත කරන ලදී.
