සිය සිරුරුවලින් අඩක් පිටතට දමාගෙන දක්ෂිණ අධිවේගී මාර්ගයේ අනාරක්ෂිත ලෙස මෝටර් රථයක් ධාවනය කළ රියදුරෙක් ඇතුළු පිරිසක් අත්අඩංගුවට ගැනීමට පොලිස් විමර්ශන ආරම්භකර තිබේ.
නිල් පැහැති එම මෝටර් රථය අධිවේගී මාර්ගයේ අනාරක්ෂිත ලෙස ධාවනයේ යෙදවෙන ආකාරය වෙනත් මෝටර් රථයක ගමන් කළ පුද්ගලයෙන් වීඩියෝගත කර සමාජ මාධ්‍ය ජාලය ඔස්සේ හුවමාරු කර තිබේ.
ඒ සම්බන්ධයෙන් මහාමාර්ග අමාත්‍යාංශය පොලීසියට කළ දැනුම් දීමකට පොලිස් විමර්ශන ආරම්භ වී ඇත.
මෝටර් රථයක ගමන් කළ තරුණයින් පිරිසක් දොර කවුළුවලින් පිටතට පැමිණ දොරවල් මත හිඳගෙන අනාරක්ෂිත ලෙස ගමන්කරනු එම වීඩියෝවේ දැක්වේ.
දක්ෂිණ අධිවේගී මාර්ගයේ කඩවත සිට මාතර දක්වා කොටසේ එම මෝටර් රථය ගමන් කර තිබේ.
මොටර් රථයේ ලියාපදිංචි අංකයට අනුව පරීක්ෂා කිරීමේදි එම රථය මහනුවර ප්‍රදේශයේ පුද්ගලයෙකුට අයත් බව අනාවරණය වූ බවත් ඔහු එම රථය තවත් පුද්ගලයෙකුට ලබාදී ඇති බවත් විමර්ශනවලින් පෙනී ගොස් ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතීඥ අජිත් රෝහන මහතා සදහන් කළේය.
