ගෑස් සිලින්ඩර්වල සංයුතිය පරීක්ෂා කර බැලීමේ විමර්ශනයේ වාර්තාව අද ලැබෙනු ඇතැයි පාරිභෝගික ආරක්ෂණ කටයුතු රාජ්‍ය අමාත්‍ය ලසන්ත අලගියවන්න මහතා පවසයි.
ගෑස් සිලින්ඩර් පුපුරා යාමේ සිද්ධීන් සම්බන්ධයෙන් නිර්දේශ ඇතුළත් වාර්තාවක් මොරටුව විශ්වවිද්‍යාලයෙන් කැඳවීමට ද රජය තීරණය කර තිබේ.
රාජ්‍ය අමාත්‍ය ලසන්ත අලගියවන්න කියා සිටියේ ශ්‍රී ලංකා ප්‍රමිති ආයතනයට සහ ලංකා ඛනිජ තෙල් නීතිගත සංස්ථාවට යොමු කර ඇති සාම්පල සලකා බලා එම වාර්තාව ලබා ගන්නා බවයි.
රාජ්‍ය අමාත්‍යවරයා පෙන්වා දෙන්නේ මෙය ජාතික ප්‍රශ්නයක් බවත්, මෙය කල් දැමීමට හෝ බෝල පාස් කිරීමට හැකි ප්‍රශ්නයක් නොවන බවත් තමාගේ වගකීම වී ඇත්තේ පාරිභෝගිකයා ආරක්ෂා කිරීමට හැකි පියවර ගැනීම බවත් තමා ඒ කටයුත්ත ඉටු කරන බවත් ය.
ගෑස් සිලින්ඩර් පිපිරීමට හේතුව සොයා බැලීම සඳහා දිවයින පුරා තනි සාම්පල 20 ක් ලබා ගෙන තිබුණි.
මේ වන විට ගෑස් පිපිරීම් සිද්ධීන් අටකට ආසන්න සංඛ්‍යාවක් වාර්තා වී තිබේ.
