මාළු ව්‍යාපාරිකයෙකුට අයත් මෝදර වීදියේ පිහිටි නිවසක සිදුව ඇති රුපියල් කෝටියකට අධික රන් භාණ්ඩ සොරකමක් සම්බන්ධයෙන් මෝදර පොලිසිය පුළුල් විමර්ශනයක් ආරම්භකර ඇත.
මෙම සොරකම පෙරේදා (07) පෙරවරු 9.15ත් ඊයේ (08) උදෑසන 8.20ත් අතර කාලය තුළ සිදුව ඇති බව පොලිසිය සඳහන් කරයි. එම අවස්ථාවේදී නිවසේ රැදී සිට ඇත්තේ මෙහෙකාරිය පමණක් බව ව්‍යපාරිකයා පොලිසියට පවසා ඇත. එම මෙහෙකාරිය මෙම නිවසේ සේවයට එක්කරගෙන ඇත්තේද ඉකුත් 01 වෙනිදාය.
පවුම් 50කට අධික බරැති රන් භාණ්ඩ සොරාගෙන ගොස් ඇති බව ව්‍යාපාරිකයා පොලිසියට කළ පැමිණිල්ලෙහි සඳහන්ය. අල්මාරියක තිබූ එම රන් භාණ්ඩ අතර වළලු 16ක්, මාල 05ක්, මුදු 14ක්, පෙන්ඩන් 05ක්, කරාබු ජෝඩු 01ක් තිබී ඇත.
