ශ්‍රී ලංකාවේ රාජ්‍ය අංශයේ වෘත්තීය සමිති අද රටපුරා වැඩ වර්ජනයක් දියත් කර තිබේ.
ඒ රජයේ ජනතාවට පීඩාකාරී වී ඇති නව බදු ප්‍රතිපත්තිය සංශෝධනයට ඉල්ලා සිටිමිනි.
දිවයින පුරා රෝහල්වල ආරම්භ වූ වැඩවර්ජනය මේ වන විට ජල සම්පාදන, විදුලි, වරාය, බැංකු, අධ්‍යාපන ඇතුළු අනෙකුත් රාජ්‍ය අංශ වෙත ද ව්‍යාප්ත වී තිබේ.
සමස්ත ලංකා හෙද සංගමය, ජල සම්පාදන වෘත්තීය සමිති ඒකාබද්ධ සංවිධානය, සමස්ත ලංකා වරාය රාජ්‍ය සේවක සංගමය, ලංකා බැංකු සේවක සංගමය, රාජ්‍ය හා අර්ධ රාජ්‍ය වෘත්තීය සමිති, ලංකා ගුරු සංගමය සහ ප්‍රධාන වෘත්තීය සමිති මෙම වර්ජනයට එක්ව සිටිති.
ජාතික වෘත්තීය සමිති මධ්‍යස්ථානය අනතුරු අඟවා ඇත්තේ සංගමයේ ඉල්ලීම්වලට රජය ප්‍රතිචාර දැක්වීමට අපොහොසත් වුවහොත් මාර්තු 15 වනදා රටපුරා වැඩවර්ජනයක් දක්වා තම ක්‍රියාමාර්ග උග්‍ර කරන බවයි.
වෘත්තිය සමිති ඉල්ලීම්වලට රජය තවමත් ප්‍රතිචාර දක්වා නොමැත.
