fbpx
තවත්
    මුල් පිටුවඋණුසුම් පුවත්ලෝක ළමා සහ වැඩිහිටි දිනය අදයි

    ලෝක ළමා සහ වැඩිහිටි දිනය අදයි

    ලෝක ළමා දිනය සහ වැඩිහිටි දිනය අදට (01) යෙදී තිබේ.

    ‘සෑම දරුවෙකුටම යහපත් අනාගතයක්’ මෙවර ලෝක ළමා දින තේමාවයි.

    එමෙන්ම මෙවර ලෝක වැඩිහිටි දිනයේ තේමාව වන්නේ ‘වෙනස් වන ලෝකයක වැඩිහිටි පුද්ගලයින්ගේ ඔරොත්තු දීමේ හැකියාව.’යි.

    මෙවර ලෝක ළමා සහ වැඩිහිටි දිනය වෙනුවෙන් වයස අවුරුදු 12න් පහළ දරුවන් සහ අවුරුදු 60ට ඉහළ වැඩිහිටියන්ට දෙහිවල සත්ත්වෝද්‍යානය හා එයට අනුබද්ධ සත්ත්වෝද්‍යාන නොමිලේ නැරඹීමට ජාතික සත්ත්වෝද්‍යාන දෙපාර්තමේන්තුව කටයුතු යොදා ඇත.

    ඒ අනුව අද උදේ 8.30 සිට සවස 5.00 දක්වා දෙහිවල සත්ත්වෝද්‍යානය මෙන්ම පින්නවල සත්ත්වෝද්‍යානය, පින්නවල අලි අනාථාගාරය සහ සෆාරි උද්‍යානයද ළමයින්ට සහ වැඩිහිටියන්ට නොමිලේ නැරැඹීමට අවස්ථාව උදාවේ.

    ළමයින් වෙනුවෙන්ම සංවිධාන කළ විශේෂාංග රැසක් මෙදින එම සත්ත්වෝද්‍යාන තුළ පැවැත්වීමට කටයුතු යොදා ඇත.

    දැයේ දූ දරුවන්ගේ අධ්‍යාපනික දැනුම, ස්වභාවික සම්පත් හා පරිසර සංරක්ෂණය පිළිබඳ ආකල්ප, හැකියා වර්ධනය කිරීම, විනෝදාස්වාදය දීම පෙරදැරිව මේ වැඩසටහන් ළමා දිනය නිමිත්තෙන් ක්‍රියාත්මක ය.

    මේ අතර ලෝක ළමා සහ වැඩිහිටි දිනය වෙනුවෙන් ජනාධිපති රනිල් වික්‍රමසිංහ මහතා ද පණිවුඩයක් නිකුත් කර තිබේ. එය පහත දැක්වේ.

    “සමකාලීන සමාජයේ වෙසෙන වැඩිහිටි අපට ගෝචර වන ලෝකය, දරුවන්ගේ ලෝකය නොවේ. එය බෙහෙවින් සරලය. මටසිලිටුය. ඔවුන් කුතුහලයෙන් පිපාසිතය. වැඩිහිටි අපි ඒ පිළිබඳ නුවණින් වටහා ගෙන, පෙර නොවූ විරූ ලෝකයක් ඔවුන් වෙනුවෙන් නිර්මාණය කිරීමට වගබලා ගත යුතුය.

    පසුගිය වසර කිහිපය සැලකිල්ලට ගැනීමේ දී මෙයට වසර කිහිපයකට පෙර දරුවන් ගත කළ සමාජ පසුතලයට වඩා වර්තමානය බෙහෙවින් වෙනස් වී තිබෙන බව පැහැදිලිය. මේ සම්බන්ධයෙන් ජනමාධ්‍යයෙන් කෙරෙන අනාවරණයන් ද බොහෝය. එ බඳු පසුබිමක රටේ සියලූම දරුවන් නිසි කැලරි ප්‍රමාණය අඩංගු සමබල ආහාර වේලක් ලබාගන්නා බව සහතික කිරීම, රාජ්‍ය නායකයා වශයෙන් මගේ යුතුකමයි. රටේ වත්මන් දරු පරපුරට පෝෂණයත්, අනාගත දරුපරපුරට දියුණු සංවර්ධිත රටක් නිර්මාණය කර දීමත් මේ මොහොතේ මගේ මෙහෙවර වේ.

    මා විසින් ඉදිරිපත් කළ ප්‍රතිපත්ති ප්‍රකාශය පරිදි දිළිදු හා අඩු වරප්‍රසාදිත කණ්ඩායම් රැකබලා ගැනීම කෙරෙහි අවශ්‍ය කටයුතු ක්‍රමිකව සිදු කෙරෙමින් පවතී. පාසල් දරුවන් වෙනුවෙන් රජයේ වියදමින් සමබල ආහාර වේලක් ලබාදීමට කටයුතු කරන අතර, එහි ආරම්භයක් වශයෙන් පාසල් දරු දැරියන් 1,080,000කට උදෑසන පාසල් ආරම්භ වීමට පෙර සමබල පෝෂ්‍යදායී ආහාර වේලක් ලබාදීම දැනටමත් සිදු කෙරේ. එය සෞඛ්‍ය අමාත්‍යාංශයේ පෝෂණ විශේෂඥයන්ගේ අනුමැතියෙන් සිදු කෙරෙන ව්‍යාපෘතියකි. එමෙන්ම ගැබිණි මව්වරුන් සඳහා ලබාදෙන දීමනාවට අමතරව තවත් අමතර දීමනාවක් සහ ආහාර සුරක්ෂිතතාව නොමැති පවුල් සඳහා මාසිකව දීමනාවක් ලබාදීම කෙරෙහි රජයේ අවධානය යොමුවී ඇත.

    දරුවන්ගේ සුන්දර ළමා කාලය මෙන්ම අපේ රටේ උන්නතිය උදෙසා අසීමිත කැපකිරීම් කළ වැඩිහිටි ප්‍රජාව ද සෙනෙහසින් රැකබලා ගැනීම අපගේ යුතුකමකි. එය අපේ සංස්කෘතිය හා බද්ධව පවතී. ආහාරපාන, අධ්‍යාපනය, ක්‍රීඩාව, සෞන්දර්යය, විවේකය, නින්ද, මානසික සුවය, ශාරීරික නිරෝගීතාව දරුවන්ගේ අවශ්‍යතාවලින් කිහිපයක් පමණි. ඒවා ලබාදීමට අපි සංස්කෘතිකමය හා නෛතික වශයෙන් බැඳී සිටිමු. රජය හැරුණු කොට ඔවුන්ගේ අවශ්‍යතා පසුවට කල් නොතබා ඉටු කිරීම මව්පියන්, ගුරුවරු ඇතුළු සිවිල් සංවිධාන නියෝජනය කරන සියලුදෙනාගේ ද වගකීම ලෙස මම දකිමි.

    සියලු දරුවන් හා වැඩිහිටියන් තමන්ගේ සමීපතමයන් සේ සලකා ඔවුන් දෙස සෙනෙහසින් බලන, දකින සහ ක්‍රියා කරන යුගයක් උදා කර ගැනීමට අපි සැවොම එක්ව කැප වෙමු.”

    මෙවන් පුවත් එසැනින් දැන ගන්න අපේ WhatsApp News සේවාවට එකතු වන්න.

    ඔබේ අදහස් දක්වන්න.