ශ්රී ලංකාව කඩුලු දෙකකින් පරාජය කරමින් පල්ලෙකැලේ ජාත්යන්තර ක්රිකට් ක්රීඩාංගණයේ පැවති පළමු එක්දින තරගයේ ජය ගැනීමට ඕස්ට්රේලියා කණ්ඩායම මීට සුළු වේලාවකට පෙර සමත්විය.
පළමුව පන්දුවට පහර දුන් ශ්රී ලංකා කණ්ඩායම කඩුලු 7ක් දැවී ලකුණු 300ක් ලබා ගත් අතර කුසල් මෙන්ඩිස් ලකුණු 86ක්,ධනුෂ්ක ගුණතිලක 55ක්, පැතුම් නිශ්ශංක 56ක් ලබා ගනිමින් කැපී පෙනෙන පිතිකරණයක නියැලිණි.
ඕස්ට්රේලියානු කණ්ඩායම පන්දුවට පහර දෙමින් සිටියදී වර්ෂාවෙන් තරගයට බාධා එල්ල වූ අතර ඒ අනුව පිළිතුරු ඉනිම පන්දුවාර 44කට සීමා විය. ජයග්රහණය සඳහා ලකුණු 282ක් හඹා ගිය ඕස්ට්රේලියානු කණ්ඩායම කඩුලු දෙකක් ඉතිරිව තිබියදී පන්දුවාර 42.3කදී සිය ජයග්රහණය වාර්තා කළේය.
හයේ පහර හයක් සමඟ නොදැවී ලකුණු 80ක් ලබා ගත් ග්ලේන් මැක්ස්වෙල් තරගයේ වීරයා සම්මානය හිමිකර ගත්තේය.