යුරෝපා සංගමයට අලෙවිකරන ඇපල් අයිෆෝන් සඳහා මෙතෙක් භාවිතා කළ ආරෝපණ ක්‍රමය (චාජින් පොට්) වෙනස් කිරීමට සිදුව තිබේ.
යුරෝපා සංගමය තුල යූ.එස්.බී.සී වර්ගයේ චාජින් පොට් පමණක් භාවිතා කිරීමට තීරණය කිරීම හේතුවෙන් ඇපල් සමාගමට මෙලෙස සිය චාජින් පොට් වෙනස් කිරීමට සිදුව ඇත.
තම කලාපය තුල පොදු චාජින් පොට් ක්‍රමයක් ඇති කිරීම මගින් පාරිභෝගිකයින්ට පහසුවක් සැලසීම සඳහා යුරෝපා සංගමය විසින් මෙම තීරණය ගෙන තිබිණි. යුරොපා සංගමය විසින් ගතවූ දශකයක කාලය තුල මෙලෙස පොදු චාජින් ක්‍රමයක් ස්ථාපිත කිරීමට අවස්ථා කිහිපයකදීම උත්සහ කර තිබිණි.
ඒ අනුව 2024 සිට ඇපල් සමාගමට මෙලෙස සිය චාජින් පොට් වෙනස් කිරීමට සිදුවන අතර අනෙක් ජංගම දුරකථන, ටැබ්, කැමරා ඇතුළු ඉලෙක්ට්‍රෝනික් උපකරණ සඳහා මෙම පොදු චාජින් පොට් ක්‍රමය ක්‍රියාත්මක වනු ඇත.
මෙම තීරණය සම්බන්ධයෙන් මීට පෙර යම් අප්‍රසාදයක් ඇපල් සමාගම විසින් ප්‍රකාශ කර තිබූ අතර එහිදී ඔවුන් පවසා සිටියේ මෙම තීරණය මගින් නව තාක්ෂණික නිර්මාණ බිහිවීමට බාධාවක් ඇතිවිය හැකි බවයි. ඇපල් අයි ෆෝන් සඳහා දැනට ලයිට්නින් කේබල් යොදා ගන්නා අතර එය සම්පූර්ණයෙන්ම ඉදිරියේදී වෙනස් කිරීමට සිදුවනු ඇත.
එහිදී දැනටමත් යූ.එස්.බී. සී භාවිතා කරන ඇන්ඩ්‍රොයිඩ් ජංගම දුරකථන සඳහා මෙම නීතිය වාසිදායක විය හැකි බවටද වාර්තාවේ.
