මාකඳුරේ මධුෂ්ගේ සමීපතයෙක් බව කියන සන්ෂයින් සුද්දා නැමැති අපරාධකරු ඝාතනයට යොදාගත්තේයැයි කියන ටී 56 අවිය බස්නාහිර පළාත් උතුරු දිසා අපරාධ කොට්ඨාශය විසින් ඔවුන්ට ලද තොරතුරකට අනුව යාගෙන ඇත්තේ එම ඝාතනය වූ ස්ථානයේ සිට මීටර් 100 ක් පමණ දුරකින් පිහිටි පාළු ස්ථානයක තිබියදී බව පොලිස් තොරතුරු සඳහන් කරයි.
පොලිස් මාධ්‍ය ප්‍රකාශක කාර්යාලය සඳහන් කරන්නේ කොටුවිල පොලිස් වසමේ හේන්වල දී ඊයේ (03) ගිනි අවිය හමුවී ඇති බවය.
සන්ෂයින් සුද්දාගේ ඝාතනය සිදුවන්නේ ඉකුත් සැත්තැම්බර් 03 වෙනිදාය. ගිනි අවිය සොයා ගන්නේ හරියටම එම ඝාතනයෙන් මාස 03 කට පසුවය.
සන්ෂයින් සුද්දාගේ ඝාතනයෙන් පසුව පොලිස් නිල සුනඛයින් පවා යොදා පොලීසිය පරීක්ෂණ පවත්වනු ලැබීය.
අනතුරුව එම ඝාතනයට සම්බන්ධ වූ කිහිප දෙනෙක්ම අත්අඩංගුවට ගත් අතර එම සැකකරුවන් අතර සන්ෂයින් සුද්දාගේ අනියම් බිරියද සිටියේය.
ඉකුත් නොවැම්බර් 26 වෙනිදා කළුතර දී පොලිස් වෙඩිල්ලකින් මරුමුවට පත්වූ ටිංකරින් ලසන්ත නැමැත්තා සන්ෂයින් සුද්දාගේ ඝාතකයා බව පොලීසිය කීවේය. ආයුධ පෙන්වීමට ගොස් ඔහු පොලිසිය සමඟ ගැටී මුරුමුවට පත්වූ බව පොලීසිය සඳහන් කළේය. කළුතර පොලීසිය විසින් අත්අඩංගුවට ගත් අවස්ථාවේදී පවා සන්ෂයින් සුද්දාට වෙඩි තැබූ ගිනි අවිය සැඟවූ ස්ථානය ගැන ටිංකරින් ලසන්ත පවසා තිබුණි නම් එම අවිය සොයා ගන්නේ මෙයට පෙරය.
කෙසේ වෙතත් සන්ෂයින් සුද්දා ඝාතනයට යොදා ගත්තේ යැයි කියන ටී 56 ගිනි අවිය මාස 03 ක් තිස්සේ මහපාර අයිනේ පදුරක් අස්සේ තිබියදී සන්ෂයින් සුද්දාගේ ඝාතන විමර්ශන පැවැත්වූ කොටවිල පොලීසියට සොයා ගැනීමට හැතියාවක් ලැබී තිබුණේ නැත. පොලීසිය පවසන්නේ ගිනි අවිය හොදින් ඔතා ආරක්ෂාකාරීව එම ස්ථානයේ දමාගොස් තිබුණු බවය.
