හදිසියේ සිදුවූ විදුලිය බිඳ වැටීම හේතුවෙන් ඊයේ (3) පෙරවරුවේ පාර්ලිමේන්තු මන්ත්‍රීවරුන් වන තුෂාර ඉඳුනිල් හා ලලිත් එල්ලාවල පාර්ලිමේන්තු විදුලි සෝපානයේ විනාඩි 20 ක පමණ කාලයක් සිරව ඇත.
ආරක්ෂක අමාත්‍යංශයෙ අයවැය විවාදයට සහභාගීවීමට මෙම මන්ත්‍රීවරුන් දෙදෙනා පාර්ලිමේන්තු සභා ගර්භයට පිවිසෙන විදුලි සෝපානයට ඇතුළුවී සිටියදී මෙම සිදුවීමට මුහුණ දී ඇත.
විදුලිය විසන්ධි වීමත් සමඟ පාර්ලිමේන්තුවේ විදුලි ජනන යන්ත්‍ර (ජෙනරේටර) ද නිසි පරිදි ක්‍රියාත්මක නොවීමෙන් මන්ත්‍රීවරුන් දෙදෙනා සමග විදුලි සෝපානය අතරමග නතරවී වූ බව තුෂාර ඉදුනිල් මන්ත්‍රීවරයා පැවසීය.
පසුව පාර්ලිමේන්තු නිලධාරීන්ට මේ බව දැන්වීමත් සමග ඔවුන් විසින් මන්ත්‍රීවරුන් දෙදෙනා විදුලි සෝපානයෙන් පිටතට ගෙන තිබේ.
ඒ වනවිට තමන් හා ලලිත් එල්ලාවල මන්ත්‍රීවරයා විනාඩි 20ක් පමණ විදුලි සෝපානයේ සිරවී සිටි බවද තුෂාර ඉඳුනිල් මන්ත්‍රීවරයා සදහන් කළේය.
