කොවිඩ් වසංගතය හේතුවෙන් අක්ෂි රෝගී තත්ත්වයන් ඉහළ ගොස් ඇතැයි ජාතික අක්ෂි රෝහලේ අධ්‍යක්ෂ වෛද්‍ය ධම්මික අලහප්පෙරුම මහතා පැවසීය .
කොවිඩ් වසංගතය හේතුවෙන් දියවැඩියා රෝගීන්ට නියමිත පරිදි සායනවලට සහභාගි වීමට නොහැකි වීමත් දියවැඩියා ඖෂධ ලබා ගැනීමට නොහැකිවීමත් නිසා ඔවුන්ගේ අක්ෂි රෝග තත්ත්වයන් ඉහළ ගොස් ඇති බවට වාර්තා වන බව වෛද්‍ය අලහප්පෙරුම මහතා පැවසීය.
දියවැඩියාව අක්ෂි රෝග වලට ප්‍රබල ලෙසම බලපාන හෙයින් දියවැඩියා රෝගීන් ඒ පිළිබඳ විශේෂ අවධානයක් යොමු කළ යුතු බව වෛද්‍යවරයා පැවසීය.
කොළඹ ජාතික අක්ෂි රෝහලේ කටයුතු මේ වන විට සාමාන්‍ය පරිදි සිදුකරන අතර දිනපතා පෙරවරු 8 සිට පස්වරු 8 දක්වා බාහිර ප්‍රතිකාර ඒකකද දිනපතා පස්වරු 4 දක්වා සායනද පැවැත්වෙන බැවින් අක්ෂි රෝගීන්ට එහි පැමිණ ප්‍රතිකාර ලබාගත හැකි බව ද රෝහල් අධ්‍යක්ෂවරයා කීය.
මීට අමතරව දිවයින පුරා පිහිටි ප්‍රධාන රෝහල්වල අක්ෂි සායන හා අක්ෂි ප්‍රතිකාර ඒකක පැවැත්වෙන අතර ඒවායින්ද රෝගීන්ට ප්‍රතිකාර ලබාගත හැකි බව රෝහල් අධ්‍යක්ෂවරයා කීය.
