අනුරාධපුර සඳහිරු සෑයේ කොත්වහන්සේ මත අදට (08) යෙදුණ සුබ මොහොතින් චූඩා මාණික්‍ය පළඳවා තිබේ.
පිරිත් සඡ්ඡායනා මධ්‍යයේ රට පුරා බැතිමතුන්ට වැඳ පුදා ගැනීම සඳහා පෙරහරකින් වැඩම කළ චූඩා මාණික්‍ය අද මෙසේ කොත් වහන්සේ මත පළඳවනු ලැබිණි.
මෙම අවස්ථාවට මහා සංඝරත්නය සහ චූඩා මාණික්‍ය පරිත්‍යාග කළ අයි.ඩබ්ලිව්.එස් හෝල්ඩින්ග්ස් අධිපති ආතර් සේනානායක මහතා ඇතුළු හමුදා සාමාජිකයෝ පිරිසක් සිටියහ.
පුරා දශක තුනක් තිස්සේ පැවති කුරිරු යුද්ධය අවසන් කිරීම සඳහා ජීවිත පරිත්‍යාග කළ හා අබාධිත තත්ත්වයට පත් සියලු රණවිරුවන්ගේ උදාර සේවය අගය කරමින් ඉදිකළ සඳහිරු සෑය ලබන 18 වැනිදා ජනපති අගමැති ප්‍රධානත්වයෙන් සසුනට පූජා කිරීමට නියමිතය.
රුවන්වැලි මහා සෑයට පසුව ඉදිවන විශාලම දාගැබ මෙය වන අතර මුළු ත්‍රිපිටකයම රන්පත් වල සටහන් කර දාගැබේ නිදන් කර ඇත. තවත් සර්වඥ ධාතු සහ නිදන් වස්තු රාශියක් නිදන් කර තිබේ.
ආරක්ෂක ලේකම් (විශ්‍රාමික) ජෙනරාල් කමල් ගුණරත්නගේ උපදෙස් මත හා යුද හමුදාපති ජෙනරාල් ශවේන්ද්‍ර සිල්වාගේ මෙහෙයවීම මත යුද හමුදා නව වෙනි ඉංජිනේරු සේවා රෙජිමේන්තු සිවිල් ඉංජිනේරුවරුන් ඇතුළු රණවිරුවන් හා ආරක්ෂක අංශ සාමාජිකයෝ මෙම සෑය ඉදිකිරීමට දායක වූහ.
ඡායාරූප defence.lk වෙබ් අඩවියෙනි.
