සිය වැඩිමහල් එකියගේ හදිසි ඇමතුමේ හඩ වෙනදාට වඩා ගිගුම් දුන්නෙන් අමරබන්දු ඇලවී සිටි බූරු ඇදෙන් බිමට පතිත වෙමින්ම අවදි විය.
මොකෝ කෙල්ලෙ…. සිය දෑස දෑල්ලෙන් පිසදමමින්ම ඔහු ඇසුවේ අතිෂය වික්ෂිප්ත වූ මනසකිනි.
ආන්න… රූං අයියලගෙ ගෙදරට නීතිය කරන මහත්තුරු පැනල… ලොකු එකියගේ හඩින් අමරබන්දු පමණක් නොව සිය පවුලේ සැවොම එක ලෙස කලබල වූහ.
මලකෙළියයි…. කියාගත් අමරබන්දු සිය සරොම කරේ හොවාගෙනම දිවගියේ රූං එකාලයෙ දිහාය.
සිය හිච්චි සහොදරීගෙ බඩපිස්සා වූ රූං කොල්ලා පුංචි සන්දියේ පටන්ම චූටි මාමෙ කියා සිය ඇසේ හිදගෙනම කරදඩු දික්වූ නිසාමදෝ රූං එකාට අමරබන්දු පණ ඇරලාය. නීතිය කොරන මහත්තුරු කොල්ලාව කුදලාගෙන යන්න කළියෙං යාගන්න ඕනෙ හති හලමින් ඒ වනවිටත් රූං එකාලගෙ දිහා ට දිව යමින් සිටි අමරබන්දු ගේ වේගය තවත් වැඩිකළේය.
අමරබන්දු එහි යනවිටත් රූං එකාලගෙ නිවස ඉදිරිපිට පොදි කන ගම්මු දැක සිය වෙගය තරමක් අඩු කළේ නීතිය කොරන මහත්තුරු වැඩ ඉන්න තැනකට ගරු සරු ඇතුව යන්නට වුවමනා නිසාය. ඒ වනවිටත් වරෙන්තු පිට හිටපු රූං එකාව නීතිය කොරන උන්නාන්සෙලාට අහුවෙලා කියන්නේ කොල්ලව දැනටමත් කෝටු මස් කොරල අති රැස්ව සිටි ජනයා අතරින් අමරබන්දු හීන්විඩේ රිංගුවේ දෙගිඩියාවකිනි.
එසේ සෙමෙන් ඉදිරියටම රිංගාගත් අමරබන්දු දුටු දර්ශනයෙන් ඔහුහට සිය දෑස විශ්වාස නොවීය. හීන් කොල්ලගේ නිවෙස ඉදිරිපිට පෝළිම් ගැසී සිටි උඩරට නැට්ටුවන්ගෙන් සැදුම්ලත් කණ්ඩායමකි. සිය පාදයන්හි බැද තිබූ ගෙජ්ජි වැල් “සිරිං..සිරිං” නද දෙමින් නොඉවසිල්ලෙන් ලක ලැහැස්තිව සිටියේ ඊළග නිමේශයේදී තමන් ලබන අණින් නර්තනයේ යෙදෙන්නටය. තරු පටි බැද විරාජමානව සිය අහංකාර උදරයන් පුම්බාගෙන රූං කොල්ලාගේ නිවස අදදර වැඩ සිටි නීතිය රකින මහත්තුරු කිහිපදෙනෙකි.
අවසන සියල්ලන් අපේක්ෂාවෙන් සිටි මොහොත උදාවිය.
තරු පටි බැදි මහත්තුරු දෙදෙනෙක් ට මැදිව රූං කොල්ලා සිය නිවසේ කොට උළුවහුවෙන් පහත්වී එළිපත්තට පැමිණෙන විට දෙපස රැස්ව හුන් හුදී ජනී ජනයා “අනේ….” යනුවෙන් කළ නදින් අහල ගම් හතක් වෙවුළුම් කන්නට ඉඩ තිබුණි. වෙනදා මෙන් කොල්ලගෙ දෑතේ වූ සුදුයකඩ මාංචු කුට්ටම වෙනුවට ඔහුගේ සුරතේ මල් කළඹකි. කොල්ලගේ අනෙත් අතේ දෑගිලි පටළවා ඌට නොරිදෙන්නට අල්ලාගෙන උන්නේ අනෙත් තරු පටි උත්තමයාය. ගෙළෙහි රත්වන් වද මල් මාලයකි. කොල්ලාව මිදුල් කෑල්ලට කැන්දගෙන එනවාත් සමගම තවත් තරු පටි උත්තමයෙක් ඌගෙ හිසට ඉහළින් මුතු කුඩයක් ඉහළුවේය. තවත් උත්තමයෙක් කොල්ලට අතරමගදී සප්පායම් වෙන්නයැයි කියා පරළු පාං සැන්විච් මල්ලක්ද අලියා බීම බෝතල් පෙට්ටියක්ද ලහි ලහියේ නිල් පැහැති ජීප් රථයට පටවා ගත්තේය.
රූන් කොල්ලාව රැගත් පෙළපාලිය ඇරඹුනේ ඉදිරිපෙළ ලක ලැහැස්තිව හුන් උඩරට නැටුම් සන්දර්ශනයෙනි. ඔවුන් “රුන්තක ජින්තක තරිකිට කුන්ද තාම්” කියමින් නර්තනයේ යෙදෙමින් ද උඩ කරණම් බිම කරණම් ගසමින් ද ලකේට රූං කොල්ලාව නීතිය කොරන මහත්තුරුන්ගේ නිල් පැහැති ජීප් රථය වෙත රැගෙන යද්දී අමරබන්දුගේ පමණක් නොව රූං කොල්ලාගේ ද දෑස් උඩ ගොස් අන්ද මන්ද ව හුන්නේය. ලෝකය පැතලි වෙලාද, නැත්නම් පෙරළීම නැවතිලාද කිසිවෙකුට සිතාගත් නොහැකිය.
නර්තනය නැවතුනි, රූං කොල්ලා පටවා ගත් නිල් පැහැති ජීප් රථය යන්නට එන්ජිම පණගැහුවේය. ඉදිරි පස අසුනේ වැළමිට අඩක් එළියට හොවා හිද උන් තරු පටි උන්නාන්සේ
“කෝ මේ ළමයගේ පවුලේ කවුරුත් ඉන්නවද?” ඔහු විපරම් කළේය.
“අනේ මහත්තයො අපේ කොල්ලට හිරිහැරයක් කොරන්න නම් එපා” කියාගෙන දෙකට නැවීගත් කොණ්දකින් යුතුව බගෑපත් අමරබන්දු ඉදිරියට පැමිණියේය.
“ආ මාමා බයවෙන්න එපා… මේ පාර ග්‍රෑම් පහයිනෙ අහු වුනේ හෙට අනිද්දාම උසාවි දානවා” උන්නාන්සෙ කියාගෙනම ජීප් රථය ඉදිරියට ඇදෙන්නට විය. මදක් ඉදිරියට ඇදී නතර කළ ජීප් රථයෙන් හිස එළියට දැමූ උන්නාන්සෙ අමරබන්දු නැවතත් කැදවුයේය.
“මේ කොළුවට ගූගල් එකවුන්ට් එකක් තියෙනවද… මොකද මූ රෑට කිව්වොත් හංගපු ආයුධ තියෙන තැනක් පෙන්නන්න තියෙනවා කියලා… මූව අරං ගිහිං තලනව පෙළනවට වඩා ඌගෙන් ලොකේෂන් එක ගූගල් එකෙන් ෂෙයාර් කරගත්තහම අපේ රාළහාමි කෙනෙක් යවල බඩු ගෙන්න ගන්න පුළුවන්. එතකොට අපිටත් ලේසියි… ඌටත් ලේසියි” උන්නාන්සෙ කීවේය.
“තියෙනව මයෙ හිතේ ලොකුකෙල්ලට කියල ලියවගෙන හවහට ගෙනෙත් දෙන්නං අපේ උන්නාන්සෙ” අමරබන්දු කීයේ යාප්පුවෙනි
ඒ ක්ෂණයෙන් නිල් පැහැති ජීප් රථය දූලි කාගෙන ඉගිළ ගියේය.
